قرارك من نفسك

قرارك من نفسك:
أي حاجة بنعملها في حياتنا بتحتاج لقرار أيًا كان، بس الفكرة بقى إن القرار ده يكون طالع من جواك إنت، والفكرة الأهم إنك لما تاخد القرار ده من جواك حتى لو جه وقت وندمت فيه هتتحمل ندمك، أحسن ما تكون ندمان على قرار غيرك أخدهولك وخلاص.
في الشغل، كتير مننا معندهوش خبرة في أنواع شغل كتير، بس يعرف ناس عندها خبرة في كده، فتبتدي الناس دي تعرض عليك خبرتها وكده، بس هي مش بتديلك حرية الاختيار، لأ هي كمان ممكن تختارلك وتقررلك وإنت قاعد، فبتكون النتيجة برضو إنك ابتديت تشتغل حاجة إنت مش حاسس نفسك فيها، حاجة مش حاببها، حاجة مش هتعرف تنتج فيها أو تبدع فيها، لأنها مش هي اللي في دماغك.

وزي برضو أسوأ قرار ممكن حد ياخدهولك الجواز.. فجأة بتلاقي حد بيقنعك بشخص معين إنت دماغك مش فيه، بس الذكي هنا اللي يقدر يفكر بجد إن دي حياة كاملة، طب الدراسة والشغل هيتصلحوا وممكن تشتغل الحاجة اللي نفسك فيها وتبدع فيها، طب الجواز بعد ما فجأة أقنعوكي بمحسن ابن طنط نفيسة أو أقنعوك بسماح بنت طنط فوقية.. إيه اللي هيحصل هتلبس/ي!

من فضلك متلبسشي.. فكر كويس أوي قبل ما تاخد القرار ده، فكر في كل حاجة عن الشخص ده، ارسم أحلام وشوف هتخلص على إيه، شوف إنت مرتاح أصلاً ولا لأ.. لازم تاخد قرار زي ده من جواك عشان إنت بس اللى هتعيش الحياة دي، لما تفرح هتفرح من جواك ولو زعلت برضو هتزعل من جواك. حتى لو جه وقت وندمت على اختيارك هتكون اتعلمت، وبرضو محدش اختارلك ولا قررلك.. قرارك من جواك إنت وبس.